Мархий-Iийд хьатIадарца дола ГIалгIай Мехка Муфти кхайкарал

БисмиллахIир-рохьманир-рохьийм!

Хьамсара вежарий, йижарий!

Аз сай цIерагIа а ерригача ГIалгIайчен бусалба наьха дина юкъарлен цIерагIа а дегчура даькъала дувц шо дерригаш беза Рамазан бутт вай кхаьба чакхбаларца. ХьатIа доагIа, Даьла везаш, Даьлах кхераш, ший дегI Даьла духьа марха кхабарца цIендеш хиннача наьха деза ди. Из – Iийд ди да. Дог гIоздаьнна да вай дерригаш а, ер Мархий бутт вай кхаба вIаштIехьдаларца. Даьла раьза хургволчча бесса дIадахьа деза вай ер бусалба наьха Мархий Iийд.

Укх мархий бетта, Дала параз а даь тIадилла дола Марх кхабарал совгIа, хьалхара шерашка сенна, дукха дика хIамаш вIаштIехьа даьлар вай мехкахой: довнаш дитар, дукха сагIа далар, ца хаддаш Къуръан дийшар. Дала къоабал долда цар из. Къаьстта са белгала баха безам бар пхьенаш дита нах. Дала цIий дитача сага лургба аьнна бола маьл лойла царна.

Чоалхане ха я массанахьа латтар. Дукха зуламаш, хатараш хул мехка. Герзах а, аварех а дукха нах бов. Къаьстта ер кхоъ ди вай мехкара массайола машен арайоала ди да. Вайгара хIаранегара хьаькъал а, ийман а, сабар а эш тахана. Цудухьа аз массарга, къаьстта вай дошо мо болча кагийча нахага дехар ду, сабаре хилар а, фийле хилар а, воча хIамах лорбалар а, укх хьатIадоагIача деношка а, массахана а.

АллахIо къоабал долда вай кхаьба марха. Хьийга хало маьлехь язйойла. Дехка а даста а Дала юха йоала йойла вайна ер беркате Мархий ха. Ийман, беркат, цхьоагIо, машар хилда вай мехка а, хIаране коа а.

ГIалгIай Мехка Муфти                                                                                                                                      Хамхоев Iийса-хьажа